बंगलादेशका २४ वटा मेडिकल कलेज कालोसूचीमा, २०० नेपाली विद्यार्थी प्रत्यक्ष मारमा

काठमाडौ । मापदण्डअनुसार काम नगरेको भन्दै बंगलादेशका २४ वटा मेडिकल कलेज कालोसूचीमा परेका छन् । यसको प्रत्यक्ष मार दुई सय नेपाली विद्यार्थीमा पनि परेको छ ।

कालोसूचीमा परेका २१ कलेजमा नेपाली विद्यार्थी अध्ययनरत छन् । विद्यार्थी भर्ना गरेर मापदण्डअनुसार काम नगरेकाले बंगलादेशको डाइरेक्टोरेट जनरल अफ हेल्थ सर्भिस डिजिएचए र बंगलादेश मेडिकल एण्ड डेन्टल काउन्सिल बिएम एन्ड डिसीले २१ वटा कलेजलाई विद्यार्थी भर्नामा रोक लगाएको छ ।

यस्तै नेपाल मेडिकल कलेजले थप तीनवटा कलेजमा विद्यार्थी भर्ना लिन रोक लगाएको छ । बंगलादेशमा मेडिकल अध्ययनका लागि प्रत्येक वर्ष चार सयको हारहारीमा नेपाली विद्यार्थी जाने गरेका छन् ।

अहिले बंगलादेशका २१ वटा कलेजमा अध्ययन गर्ने झन्डै दुई सय नेपाली विद्यार्थी समस्यामा परेको नेपाल शैक्षिक परामर्श संघ इक्यानले जनाएको छ ।

समाचार स्रोत: न्युज २४ (News 24)